| |
|
01-03-2011, 09:34 AM
|
| علي بابا والاربعين برج شلش العراقي
علي بابا والاربعين برج كتابات - شلش العراقي اخوان عندي طلب بسيط واعرف متقصرون , باجر ورا المظاهرات ,محتاج كم واحد منكم يجون وياي للمنطقة الخضراء , خطية الحكومة مضيعين اربعين مليار دولار, اي والله البارحة سمعت اسامة النجيفي يكول عدنا اربعين مليار دولار امريكي مصيرها مجهول وكاعد اندور عليها , فتعالوا وياي نساعد الحكومة , وبلكي نلكاها, حرام ترى هاي فلوس مال ايتام , اي والله مال ايتام وارامل ومساكين ومهجرين ومهاجرين , بس الحكومة ضيعتها , حكومة ثولة , كل ما نحط ابيدهم شي يضيعوا , اطيناهم اصواتنا ضيعوها , اطيناهم ثقتنا ضيعوها , اطيناهم العراق ضيعوا , متكلي بعد شنطيهم ,شبيكم ثولان خو مو ثولان , اكو واحد يضيع اربعين مليار دولار , صح هو مبلغ بسيط و تافه ولا يساوي غير ميزانية اربع دول مجتمعة هي سوريا والاردن واليمن والبحرين , نمونة , قحط , مشايفين , هي اربعين مليار, شلش ليش تضخم الامور, انت ليش تسوي الحبة كبة , اربعين مليارفدوة لقندرة حسن السنيد , الفلوس وسخ دنيا , مو هيج دكتور صالح المطلك , والله شعرة بلحية خالد العطية تسوى عندي ميتيتن مليار دولار , بس مع ذلك خل ندورها , حرام اموال يتامى وارامل , اموال شعب مسكين بناته وابنائه صاروا ملطشة بدول الجوار .تعالوا نفتش عليها يمكن حطيتوها بمكان ونسيتوا , دوروا جيوبكم زين , اتذكروا خاف دفنتوها بحديقة القصر , يمكن بمطبخ المالكي, يمكن فوك الكنتور , جوا القنفة , يمكن بالحمام او فوك السطح او ورا الباب , دوروها متروح . مال حلال , واذا مالكيتوها فدوة الكم , بس مرة ثانية انتبهوا , الله وصى بالامانة , وانتوا الحمد لله كلكم تخافون الله , كلكم تخافون الله , وكل يوم ابراهيم الجعفري بالبرلمان يفسرلكم معاني الايات البينات من محكم الاي الكريم , هو يفسر وصفية السهيل تحجي بالتلفون ,هو يفسر واكو واحد كردي ما اعرف اسمه ميت من الضحك , اي والله اني شفتهم بعيني , حتى جانوا يناقشون الميزانية , وبعدين لمن حسبوا الدخل , طلعت اربعين مليار دولار ماكو , وين صارت ؟ محد يدري كلها سكته , بس هم زين راح يشكلون لجنة تحقيقية . اعلى برج بالعالم كما تقول قناة العربية هو برج دبي , بلغت تكلفته ملياردولار , وكما تقول القناة ان البرج الاعلى والافخم في العالم والمزود بكافة وسائل الراحة والاستجمام والخدمات ويشكل مدينة متكاملة يسكنه 100 الف شخص , ينعمون باخر ماتوصلت اليه البشرية من وسائل راحة , واذا حكومتنا كانت شوية شريفة وبنت بهذا المبلغ المفقود اربعين برج مثل برج دبي , كان صار عدنا اربعين مدينة متطوره يسكنها اربعة ملايين عراقي , جان اهل الثورة والشعلة والمحمودية وابو غريب والفضل والعبيدي والحسينية والكمالية وسبع قصور وحي اور وابو غريب وحي الجهاد والمتجاوزين والحواسم والمشردين والمهجرين , جان كلهم ساكنين بهاي الابراج , وجان واحدهم هسة نافخ ريشه وميعترف بالمحافظ , هم زين الحكومة ضيعت المبلغ , والله الحكومة تفتهم ضيعت المبلغ , جان صرنا علي بابا والاربعين برج, جان شخلصنا اذا اهل الشعلة كاعدين بالطابق الستين ويشوفونا من فوك ويضحكون علينا ,, جبار اللباخ من فوك البرج يصيح على مرته : تعالي سعيدة تعالي هنا , باوعي على الشارع دتشوفين ذاك الولد اليمشي وايده بجيبه ,,وينه وينه ما اشوفه , شبيج عمية , ذاك اليمشي يم الشجرة , اي اي شفته شبي خطية , لج هذا شلش العراقي عرفته من قميصه ومشيته , تضحك سعيدة من كل كلبها وتكول : شلش ابو الكلك , لو يموت ميصير براسه خير , شجابه هنا شيسوي يم برجنا , شوف الناس وين وصلت وهو بعده ماخذ الشوارع رايح جاي , نشالله اتطك عليه عبوة ونخلص من هاي الشوكلات المزعجة , اسعيدة ورجلها بعد ما شبعوا ضحك, نزلوا للمسبح شوية يرتاحون , اليوم الشمس حلوة وسعيدة محتاجة تسوي برونزاج ,اي والله تسوي برونزاج , اني شفتها وحتى صورتها بالتليفون , والله هاي مو احلام, شبيكم , اطوني اربعين مليار واذا بعد شفتوا وجهي اني مو شلش , والله سعيدة وبدرية وصبيحة واسراء وخدوجة حبيبة روحي, كلهن يستاهلن حياة افضل من برج دبي وافضل من كل ابراج الدنيا , لوبس شوية الحكومة متضيع فلوسنا ,لو بس شوية الحكومة تكول عيب ظلمناهم بما يكفي , لو بس الحكومة تصير حكومة, بس للا سف هو حظنا ويامن كعد , والله ماعدنا حظ , ذاك صرف فلوسنا على الاسلحة والحروب والقصور الرئاسية , واجوا ذولة , مهروش وطاح بكروش , ما صدكوا شافوا دولارات , صدك حيتان , مثل ما كال الكربلائي , باكو الاكو والماكو , حتى الحصة باكوها . المهم اخواتي العراقيات اخواني العراقيين , فلوسكم راحت , ومستقبل اولادكم راح , وبلدكم على وشك ان يصير شيء من الماضي , هاي الحكومة مو حكومة , هاي زبالة حشاكم , اكو حكومة بالعالم تضيع اربعين مليار دولار وتكول لشعبها اصبروا سنة واني اجيبلكم الكهرباء , واذا متصبرون انتوا بعثيين وماجورين وعملاء ومدسوسين ومرتبطين باجندة خارجية ,روحوا بعد خمسين سنة متشوفون شي كما يقول خضير الخزاعي , اني شخصيا اصبر اذا كلولي وين الاربعين مليار , وباجر رايح للمظاهرات اطالب بحصتي من الاربعين مليار , ولو اني ما شفت شي من ال 300 مليار السابقة بس ميخالف , الفات مات . راح اتظاهر باجر وابقى اتظاهر حتى اقالة الفاسدين اولهم ثلاثي بغداد المرح الزيدي وعبد الرزاق والعيساوي , راح ابقى اتظاهر حتى الحكومة تقدم استقالتها للبرلمان ورغم عدم احترامي للبرلمان بس لازم اكو خطوات شرعية نحترمها حتى لنروح للفوضى , كلشي ولا الفوضى. تستقيل احكومة وتتشكل حكومة من جديد بعدد معقول , وباسماء من المختصين والخبراء حصرا , رايح اطالب بحقي وما اسمح لاي شخص يتحدث باسمي ولا اخلي واحد يسرق صوتي , ترى اكو لصوص يريدون يضحكون علينا مرة ثانية, لا عيني لا , لا هيئة علماء المجرمين ولا كلاب الزمن الاسود ولا اصحاب الثارات الشخصية عدهم حق يختطفون صوتي ,,, هاي مظاهرة , وكل واحد يعبر عن رايه , ما اكو احد مسؤول عن احد وماكو واحد يتحدث باسم احد ,,,, افتهمتوا ,, اشوفكم باجر . |
| |
